Dharma Wacana

Om Swastyastu,

Ida dane sareng sami miwah para panureksa sane wangiang titiang,

Maduluran antuk manah lascarya, lugrayang titiang ngaturang rasa angayu bagia lan suksmaning manah, majeng ring Ida Sang Hyang Parama Kawi, duaning sangkaning sih lan pasuecan Ida, titiang miwah Ida dane sareng sami prasida mapupul iriki rikalaning ngamiletin Dharma wacana ring bulan bahasa warsane mangkin. Ring galahe sane becik puniki titiang jagi ngaturang dharma wacana sane mamurda “Nelebang Daging Sastra Anggen Ngaruruh Widya Guna”.

Ida dane sareng sami,

Nelebang daging sastra, punika merupa pabuat sane dahat mautama pisan. Riantukan pawangun jagat Baline kapungkur wekas, tan lempas ring swadharma sane kajiwapramanain antuk sastra agama Hindu. Puniki sida werdi tur limbak, majanten sangkaning kawentenan para janane, pamekasnyane para yowana utawi sisya sane makayunan nelebang sahananing daging sastra utawi cakepan-cakepan. Kabaosang sakadi asapunika, riantukan punika tan bina luir suluh sane nyuluhin awidya ring angga sarirane, mangda sida nyihnayang widya sastra, maka wiweka nimbangin iwang kalawan patute punika. Yan tan pasastra, nirdon urip ring jagate. Ring niti sastra kabaos sakadi asapuniki :

Heman I sang mamukti dumadi, tika tan hana guna,

Yowana, rupawan, kula, wisala, tika pada hana,

Den Ika tan pasastra, tanateja wadana makucem,

Lwir sekar ing sami abang murub, tan hana wangin ika.

Tegesnyane Ida dane sareng sami :

Kaon pisan manresti dados manusa, sane asapunika tan maguna,

Anom, bagus, wangsa luih, siteng, punika sami kadruenang,

Yan tan madasar sastra ( kaduegan) romane ucem tan pacaya

Tan bina kadi bunga barak ngendih, nanging tan mabo miyik.

Ida dane sareng sami sane wangiang titiang,

punika anggen pratiwimba, nampa kauripane mangda sida plapan, sampunang nega-nenga malajahin sastra, yan sakadi mamargine mangda sida rauh ka tanggu. Yan sampun ngamolihang kaweruhan, punika kaanggen pasupati ring sajeroning kauripan, anggen nyanggra pawangunan jagate, pamekas ring Bali, wastu sida ajeg, duaning punika marupa kapatutan iraga maprawerti, maka panrestian jadma Bali luih guna.

Masa muda adalah masa belajar, asapunika ketah mangkine, puniki masuksama iraga sareng sami para anom-anome, mangda teleb ngulati kaweruhan. Mapan urip masarira manusa tan bina luir patapan ambengane, ring sajeroning urip wimuda kadi mangkine, kabaos mengpeng tajep, mangan ngidepang widya sastra. Yan sampun wayah wastu sida dados kereb, maka pangayom jagat.

Iraga para yowana sareng sami,

punika anggen pratiwimba, mangda sida plapan, sampunang obah malajah mauruk sastra, ngulati kaweruhan. Maka cutet, masekolah mangda ngantos ngamolihang ijasah, tan bina sakadi panah pasupati paican Ida Bhatara Siwa, kaweruhane punika kaanggen nyanggra uripe wekasan, mangda urip tan nemu kasengsaran, maka pabuat jadma luih guna.

Jadma luih guna inggih punika jadma sane setata mingsinggihang pakerti leluhur, mapiranti antuk swadharmaning bela Negara. Yan punika sampun sida katelebang, majanten sampun mupu tetujon pemerintahe. Duaning maka unteng tetujon pemerintahe  tan lian wantah mautsaha nincapang kaonengan para janane mangda seneng ngawacen. Yan sampun seneng ngawacen sinah sida nincapang kaweruhang, sane dahat mawiguna rikala ngempu uripe kapungkur wekas.

Ida dane sareng sami,

Maka, daging pupulan dharma wacanan titiang inggih punika, iraga sareng sami mangda nelebang daging sastra mangda sida kaanggen nyanggra pewangunan jagate, pamekas ring Bali, wastu sida ajeg. Yan punika sampun sida katelebang, majanten sampun mupu tetujon pemerintahe.

Ida dane sareng sami sane kusumayang titiang,

Wantah asapunika mungguing dharma wacanan titiang ring galahe puniki. Manawi wenten maka kakirang-kirang ipun lugrayang titiang nglungsur agung rena pengampura. Maka wesananing atur puputang titiang antuk parama santhi.

Om Santih, Santih, Santih Om